ကောက်ရိတ်လျှင် ကောက်ပင်ကို လက်တစ်ဖက်ဖြင့် သိမ်းယူကာ တံစဉ်ဖြင့် အရင်းမှ ဖြတ်၍ ရိတ်ယူရသလို
တစ်ဖက်လူ၏ စကားကို သိမ်းကျုံးဖမ်းယူပြီးမှ အရင်းက ဖြတ်၍ ပိုင်လောက်အောင် ပြောဆိုခြင်းသည်
`ကောက်ပင်ရိတ်လှီး စကားပြောနည်း`မည်သည်။
ကောက်ပင်ရိတ်လှီး စကားပြောနည်းကို သာဓက အနေဖြင့် ပုံပြင်တစ်ခု ဆိုစမှတ်ပြုခဲ့သည်မှာ-
ရှေးအခါက ဥစ္စာဓန ပေါကြွယ်ဝသည့် သူဌေးသားတစ်ဦးဟာ မြားပစ်ရာတွင် အလွန်ကျွမ်းကျင်လှပါသည်။
တစ်ခါတော့ သူဌေးသားသည် ဗျိုင်းငှက်တစ်ကောင်ကို လွယ်လင့်တကူ ပစ်ယူရရှိခဲ့ရာ ဗျိုင်းငှက်အနီး မလှမ်း မကမ်းတွင် ရှိနေသူ တစ်ဦးက အကြံအဖန် အမြတ်ထုတ်လိုသဖြင့် သူဌေးသားပစ်လိုက်သော ဗျိုင်းငှက်သည် ၎င်း၏ ဗျိုင်းငှက်ဖြစ်ကြောင်း၊ ထိုဗျိုင်းငှက်သည် နေ့စဉ် ရွှေစင်တစ်ကျပ်သား ချီ၍ သူ့အား ပေးကြောင်း အလျော် ရရေး စကားဆိုသည်။
ထိုအခါ သူဌေးသားက သင်၏ ဗျိုင်းငှက်သည် ယခုလို နေ့စဉ် ရွှေစင်တစ်ကျပ်သား ချီ၍ ပေးခဲ့သည်မှာ မည်မျှ ကြာနေပြီ နည်းဟု မေးသည့်အခါ ဗျိုင်းရှင်ဟု ဆိုသူက ၃၆၅-ရက် (တစ်နှစ်)ခန့် ကြာပြီ ဖြစ်ကြောင်း ပြောသည့် အခါ သူဌေးသားက ဒီလိုဆိုလျှင် ငါ့အိမ်ရှေ့တွင် ခင်းကျင်းထားသော ရွှေပြား ၃၆၅-ချပ် ပျောက်ဆုံးနေသည်မှာ သင့်ဗျိုင်းငှက် ခိုးယူခဲ့တာဖြစ်သည်၊ သင့်မှာလည်း ခိုးရာပါ ပစ္စည်း လက်ခံထားသူဖြစ်ရာ အမြန်ပေးလျော်ရမည်။
မလျော်နိုင်က တရားစွဲဆို အရေးယူမည်ဟု ပြောကြားသောအခါ ဗျိုင်းရှင်ဆိုသူမှာ မနေဝံ့ဘဲ ရွှေပြားများကိုလည်း မလျော်ပေးနိုင်သဖြင့် အပြစ်မှ ခွင့်လွှတ်ပါရန် သူဌေးသားကို ကြောက်ရွံ့ထိတ်လန့်စွာ တိုးလျှိုးတောင်းပန်ရ လေသည်။
ဤကဲ့သို့ တစ်ဖက်သား ပြောသည့်စကားပေါ် အခြေခံကာ အပိုင်စီးနင်း ပြောဆိုခြင်းသည် -ကောက်ပင် ရိတ်လှီး စကားပြောနည်း- ဟု ဆိုစမှတ် ပြုကြပါသည်။
No comments:
Post a Comment