အိုးနှင့် ဆန်သည် တန်အောင်ချက်လျှင် နူးညံ့စွာ သုံးဆောင်ရသလို စကားအရာတွင်လည်း လိုရင်းရောက် အောင် မယုတ်မလွန် ပြောဆိုခြင်းကို “အိုးတန် ဆန်ခတ် စကားပြောနည်း” ဟု ဆိုပါသည်။
အိုးတန် ဆန်ခတ် စကားပြောနည်းကို သာဓက ထင်ရှားအောင် ပြဆိုရပါမူ-
တစ်ခါက ဗာရာဏသီပြည့်ရှင် ဘုရင်မင်းသည် မုဆိုးအသွင်ဖြင့် တောလည်ရာတွင် မျက်မမြင် မိဘနှစ်ပါးကို ပြုစုလုပ်ကျွေးနေသော ဘုရားအလောင်း သုဝဏ္ဏသာမရသေ့ငယ်ကို သားသမင်ထင်ကာ မြားဖြင့် ပစ်ခတ်မိ လေသည်၊ ရသေ့ငယ်လည်း မြားဆိပ်သင့်ကာ သေငယ်ဇောဖြင့် မေ့မြောနေခဲ့ပါသည်။
ထိုအခြင်းအရာကို သိသော သိကြားမင်းက ရသေ့ငယ်၏ မိဘများကို ““သင်တို့ မပူပန် မပူဆွေးကြနှင့်၊ သင်တို့ အနေနဲ့
၁။ သား အသက်ရှင်သန်မှု
၂။ သင်တို့ မျက်စိပြန်မြင်မှု
၃။ ရွှေအသပြာများထည့်ထားသည့် ရွှေအိုး-
အဆိုပါ သုံးမျိုးထဲက သင်တို့ လိုချင်တဲ့ တစ်မျိုးမျိုးကို တောင်းနိုင်ပါသည်”” ဟု ပြောလေသည်။
ထိုအခါ ရသေ့ငယ်၏ မိဘများဖြစ်ကြတဲ့ ဒုကူလနှင့် ပါရိကာ တို့က စကားသုံးမျိုး(ဆု သုံးမျိုး)ကို တစ်မျိုးတည်း ပြီး မြောက်အောင် ပြောဆိုသည်မှာ-
““ သား ရွှေအိုးထမ်းလာတာကို မြင်လိုပါသည်””ဟု အားလုံးပါအောင် သိမ်းပိုက်ပြောဆိုနိုင်ခဲ့ပါသည်။
သို့ဖြစ်၍ စကားတစ်ခွန်းတည်းဖြင့် လိုရာကို ပြီးပြည့်စုံစွာ ရရှိခဲ့ကြပါသည်။ ။
ဤသို့သော စကားပြောနည်းမျိုးကို ““အိုးတန် ဆန်ခတ် စကားပြောနည်း””ဟု ဆိုစမှတ်ပြုခဲ့ကြပါသည်။
No comments:
Post a Comment