တောင်ယာလယ်သားများသည် လယ်ယာစိုက်ပျိုးရန်အတွက် တောင်ယာများ ခုတ်ထွင်ရှင်းလင်းရာတွင် ချုံနွယ် သစ်ပင်ငယ်များကို အရင်ရှင်းပြီးမှ သစ်ပင်ကြီးများကို ခုတ်လှဲရှင်းလင်းသကဲ့သို့ စကားအရာတွင်လည်း ပထမ ဦးစွာ တန်ဖိုးနည်းသော စကားငယ် စကားပရိယာယ်များကိုသာ ပြောကြသည်။
နောက်ဆုံး အဆုံးအဖြတ်ပေးမည့် တန်ဖိုးကြီး စကားများဖြင့် အဆုံးသတ်ပြောဆိုခြင်းမျိုးကို ““တောင်သူ ယာခုတ် စကားပြောနည်း”ဟု စကားအရာ ပညာအနေဖြင့် ခေါ်ဝေါ်ကြပါသည်။
ထို စကားပြောနည်းကို ဥပမာပြရလျှင်-
မိတ္ထီလာပြည့်ရှင် ၀ိဒေဟရာဇ် မင်းကြီး၏သိန်းအမတ် အပါအဝင် သုခမိန်ကျော် အမတ်ကြီး ၄-ပါးနှင့် ဘုရား လောင်း ပညာရှိ သုခမိန် မဟော်သဓာအမတ်တို့ ဘုရင့်ရှေ့တော်မှာ စကားစစ်ထိုးကြရာ၌
သိန်းအမတ်ကြီးက ပြောသည်မှာ-
“ပညာနှင့် ဥစ္စာ နှစ်ခုအနက် ဥစ္စာသာ အဓိကကျ အရေးကြီးကြောင်း” ပြောသည်။
မဟော်သဓာအမတ်ကမူ ပညာသာ အမြတ်ဆုံး ဖြစ်ကြောင်း လျှောက်တင်သည်။
ထိုအခါ သိန်းအမတ်က
“မဟော်သဓာသည် ငယ်ရွယ်သူဖြစ်သဖြင့် အမှန်ကို မသိလို့ ဖြစ်ပါသည်၊ အမှန်မှာ ဥစ္စာရှိမှသာ လူအများက ခယဝပ်တွားပြီး စကားနာခံကြသည်”ဟု ထပ်လျှောက်လေသည်။
သိန်းအမတ် ပြောဆိုချက်ကို မဟော်သဓာ ပြန်လည်ချေပ လျှောက်ထားပုံမှာ-
“လူအချို့သည် ဥစ္စာပေါသော်လည်း ရောဂါဥပဒ် တစ်စုံတစ်ရာ ဖြစ်လာလျှင် ဘယ်လိုမှ မတတ်နိုင်ဘဲ ပညာရှိ ရှေ့သို့သာ အရောက်သွား ဆည်းကပ်မှီခိုကြရပါသည်” ဟု ဖြစ်လေသည်။
သိန်းအမတ်ကလည်း မဟော်သဓာ ပြောဆိုချက်ကို ချေပနိုင်ရန် ဘုရင်ကြီးကိုပင် သူ့ဘက်ပါအောင် စည်းရုံးသိမ်း သွင်း ပြောဆိုပုံမှာ-
““မှန်လှပါ အရှင်မင်းကြီး၊ အရှင်မင်းကြီးသည် ဥစ္စာရတနာပြည့်ဝကုံလုံပြီး တိုင်းပြည်သေဌ်နင်း အစိုးရ မင်း ဖြစ်နေ၍သာ လူအပေါင်း၏ ခညောင်းဝပ်တွား ရိုသေလေးစားခြင်းခံနေရပါသည်ဘုရား”- ဟု
လျှောက်တင်လေသည်၊ ထိုစကားကြားသည့်အခါ ဘုရင်ကြီးပင် ဇဝေဇဝါ ဖြစ်ခဲ့ရလေသည်။
သို့သော် ပညာရှိ မဟော်သဓာအမတ် နောက်ဆုံး လျှောက်ထားခဲ့သည့်အချက်မှာ
““ပညာရှိကြီးဖြစ်တော်မူသော မြတ်စွာဘုရားကို ဉာဏ်ပညာကြီးမြတ်၍ နတ်လူဗြဟ္မာ သတ္တဝါတို့ ကိုးကွယ်ဆည်း ကပ်နေကြပါသည်ဘုရား။
ဘုရားရှင်မှာ ကြီးမြတ်သော အလုံးစုံသိဉာဏ်မှ အခြား မည်သည့်ဥစ္စာကိုမျှ တွယ်တာစုဆောင်းထားခြင်းမရှိပါ၊
သို့ဖြစ်၍ လူနတ်ဗြဟ္မာတို့ ရွှေတောင်ကြီးအလား အားထားကိုးကွယ်ကြသည်ကို ကြည့်ခြင်းအားဖြင့် ပညာသာ အမြတ်ဆုံးဖြစ်ပါသည်”” ဟု လျှောက်ထားလိုက်လေသည်။
ထိုအခါ သိန်းအမတ်အပါအဝင် အမတ်ကြီး လေးဦးလုံး ရေငုံနှုတ်ပိတ်နေပြီး အရှုံးပေးလိုက်ကြရလေသည်။
ဤကဲ့သို့ ငယ်ရာမှ ကြီး၊ နည်းရာမှ များ စကားပရိယာယ်ကြွယ်ဝစွာ ချက်ပိုင်ပိုင် ပြောဆိုခြင်းမျိုးကို ““တောင်သူ ယာခုတ် စကားပြောနည်း”” ဟု လောကမှာ ဆိုစမှတ်ရှိခဲ့ပါသည်။ ဆက်ရန်.........
No comments:
Post a Comment