ဆီကို ရအောင် ပွတ်သည့်အခါ အထပ်ထပ် အခါခါ ပွတ်ရသလို အလိုရှိသော စကားကိုလည်း ၁-ကြိမ်နှင့် မအောင်မြင်လျှင် ၂-ကြိမ်၊ ၂-ကြိမ်နှင့် မအောင်မြင်လျှင် ၃-ကြိမ် စသဖြင့် အချိန်အခါ အခြေအနေ အရိပ်အကဲကို ကြည့်ပြီး ထပ်ကာထပ်ကာ ပြောဆိုခြင်းဖြင့် လိုရာကို ပြီးမြောက်အောင်မြင်စေခြင်းသည် “ဆီပွတ် ကျည်ပွေ့ စကားပြောနည်း” မည်သည်။
ဆီပွတ်ကျည်ပွေ့ စကားပြောနည်းကို ထင်သာမြင်သာအောင် ဥပမာသာဓကပြဆိုရပါမူ-
တစ်ခါတုန်းက မဟာစေတီတည်ရာ၌ ပိန္နဲတိုင်စိုက်ထူဖို့အတွက် မန်ကျည်းနှစ်သားကို အသုံးပြုလိုသဖြင့် “မန်ကျည်းနှစ်သား မာ၏လော” ဟု ဘုရင်က မေးသည့်အခါ ပညာရှိအမတ်က လျှောက်ထားသည်မှာ-
“မှန်ပါ၊ မန်ကျည်းနှစ်သားလည်း မာပါ၏၊ ကျွန်းသားလည်း မာပါ၏” ဟု လျှောက်လေသည်။
နောက်တစ်ခါ ဘုရင်က “ရှားနှစ်သား မာ၏လော” ဟု မေးသောအခါ “မှန်ပါ၊ ရှားနှစ်သားလည်း မာပါ၏၊ ကျွန်း သားလည်း မာပါ၏” ဟု ထပ်မံ လျှောက်ထားလေသည်။
ထိုကဲ့သို့ ပညာရှိအမတ်မှ ဘုရင်ပြောကြားသည့်စကားကို မပယ်ရှားဘဲ တကယ် မာသည့် အသုံးပြုမည့် ကျွန်း သားကို မန်ကျည်းနှစ်သား ရှားသား များလို မာကြောင်း ထပ်တလဲလဲ လျှောက်ထားသည့်အခါ ဘုရင်ဧကရာဇ်က သူ့၏ လျှောက်ထားပုံကို ကျေနပ်ကာ ကျွန်းသားကို နှစ်သက်တော်မူပြီး ဘုရားပိန္နဲတိုင်အဖြစ် စိုက်ထူရန် သဘော တူခဲ့လေသည်။
ဤကဲ့သို့ အထက်အကြီးအကဲ၏ စကားကိုလည်း မပယ်ရှား၊ အမှန် ဖြစ်သည်ကိုလည်း အကြီးအကဲလုပ်သူ သိအောင် စကား ၂-ခုကို ပူးတွဲပြီး ထပ်တလဲလဲ ပြောဆိုခြင်းဖြင့် မိမိအကြီးအကဲများ သိရှိလက်ခံလာအောင် ပြောဆိုခြင်းမျိုးကို ““ဆီပွတ် ကျည်ပွေ့ စကားပြောနည်း”” ဟု မြန်မာတို့ ခေါ်ရိုးပြုခဲ့ကြပါသည်။
No comments:
Post a Comment