ဒီနေ့တော့ အားလုံးကို မိတ်ဆက်ပေးချင်တာကတော့ အားလုံးနဲ့ ရင်းနှီးပြီးသား
`ဆေးယဉ်သူ` ဆိုတဲ့ စကားလုံးလေးဖြစ်ပါတယ်။ ဒါကတော့ အကြံပြုအနေနဲ့ ရေးတာပါနော။
ဘာမှ မပြောသေးခင် စကားလုံးလေးများရဲ့ အဓိပ္ပါယ်ကို ရှင်းပြချင်ပါတယ်။
ဆေး- အနာရောဂါတို့ကို ပျောက်ကင်းစေရန် သက်ရှိသက်မဲ့ ပစ္စည်းတို့ဖြင့် ဖော်စပ်ထားသည့် အရာ။
ယဉ်-
၁။ နူးညံ့သိမ်မွေ့ နှစ်သက်ဖွယ်ဖြစ်စေသော။
၂။ အာနိသင် လျော့ပြယ်သော အကျိုးသက်ရောက်မှု လျော့ပါးသော။
ဆေးယဉ်- ဆေးတမျိုးမျိုးကို မှီဝဲလွန်းသဖြင့် ဆေးအကျိုး မပြနိုင်ဖြစ်သည်။
ဟု မြန်မာအဘိဓာန်က ဖွင့်ဆိုထားပါတယ်၊ ဒါကတော့ ဒီနေရာမှာ အသုံးဝင်မည့် အဓိပ္ပါယ်များပင် ဖြစ်ပါသည်၊ အခြားလည်း ရှိပါသေးသည်။
လောကမှာ ရောဂါဝေဒနာတစ်ခုခု ရလာပြီဆိုရင် သက်ဆိုင်ရာ ဆေးတမျိုးမျိုးကို မှီဝဲသုံးဆောင်ရပါတယ်၊ အဲဒါမှ
ရောဂါပျောက်ကင်း သက်သာပြီး လုပ်ဆောင်ရမယ့် တာဝန်ဝတ္တရားတွေကို လုပ်ဆောင်နိုင်မှာဖြစ်ပါတယ်။
အဲဒီလိုနဲ့ မှီဝဲသုံးဆောင်မှု ပမာဏလွန်ကဲသဖြင့် ဆေးယဉ်ခြင်းများ တစ်ခါတရံ ဖြစ်တတ်ပါတယ်။
အဲဒီအခါ တခြား ဆေးကို ပြောင်းသုံးဆောင်ရတာမျိုးတွေ တွေ့ရတတ်ပါတယ်။
ထားပါတော့ ဒါက တစ်ကဏ္ဍပါ။
ယခု ပြောချင်တာကတော့-
`မည်သည့်နေ့ မည်သည့်အချိန်မှာ ----ဆရာတော်က တရားရေအေး အမြိုက်ဆေး တိုက်ကျွေးတော်မူမည်` စသည်ဖြင့် နေရာတော်တော်များများမှာ ကြားသိနေရပါတယ်။ ထို့ကြောင့်လည်း မိမိမြန်မာနိုင်ငံသားများသည် တခြားသူများနှင့်မတူ တစ်မူထူးခြားစွာ ယဉ်ကျေးနေခြင်းဖြစ်မည်ဟု စာရေးသူ ယုံကြည်မိပါတယ်။
သို့ပေမယ့် စာရေးသူကတော့ လောကမှာ မည်သည့်အရာကမျှ စင်းလုံးချော မရှိနိုင်ဆိုပေမယ့် အလှပေါ် အယဉ် ဆင့်၊ ရွှေပေါ် မြ တင် ဆိုတာလို ချောနိုင်သမျှ ချော ယဉ်နိုင်သမျှ ယဉ်စေချင်တာကတော့ ရင်တွင်းဖြစ် ဆန္ဒ တစ်ခုပါ။ စကားချပ်- (ကိုရီးယား မင်းသားမင်းသမီးများ ချောသလိုမျိုးကိုတော့ ဆိုလိုသည်မဟုတ်ပါ၊ ဘာပဲ ပြောပြော တို့ဆီမှာ ရင်တွင်းဖြစ် အလှစစ်များကတော့ ရှိနေကြပါတယ်)
ဒီနေရာမှာ ဟောကြားသူများဘက်က သတိပြုသင့်သည်များ ရှိသလို နာကြားမှတ်သားသူများဘက်က သတိပြု သင့်သည်များလည်း ရှိပါတယ်။
မိမိတို့ ယုံကြည်ကိုးကွယ်သော မြတ်စွာဘုရားသည် တရားဟောရာတွင်
၁။ ရာဂ နည်းသွားဖို့၊ (သို့) ကင်းစင်သွားဖို့။
၂။ ဒေါသ နည်းသွားဖို့၊ (သို့) ကင်စင်သွားဖို့။
၃။ မောဟ နည်းသွားဖို့၊ (သို့) ကင်းစင်သွားဖို့။
ဆိုတဲ့ ရည်ရွယ်ချက်များကို ယူမည့်သူအနေအထားပေါ်မူတည်ပြီး ထားတော်မူပါတယ်။
ထို့ပြင် အများသိ သောက ပရိဒေဝ ဒုက္ခ စတဲ့ မီးတွေ ငြိမ်းအောင်လည်း ဟောတော်မူပါတယ်။
ဥပမာ
အဇာတသတ်မင်းကြီးသည် အဖသတ်မိသောကြောင့် စိတ်ဆင်းရဲပြီး မအိပ်နိုင် မစားနိုင်ဖြစ်နေမှုများ ခံစားနေရ တယ်၊ ထိုသို့ဖြစ်နေမှုများကို တရားရေအေး အမြိုက်ဆေးကို တိုက်ကျွေးတော်မူခြင်းဖြင့် သက်သာရာရစေခဲ့ ပါတယ်။
ထို့ပြင် အချောအလှ မိဖုရားရတနာ မလ္လိကာဒေဝီ နတ်ရွာစံသဖြင့် ကောသလမင်းကြီးခံစားနေရသော ဝေဒနာ များကိုလည်း သက်သာရာရစေခဲ့ပါတယ်။
ဤသို့ဖြင့် မြတ်စွာဘုရား တရားတော်များဟောတော်မူခြင်းသည် ရာဂ ဒေါသ မောဟ-စသော မီးများ နည်း သွားဖို့ ကင်းစင်ပပျောက်သွားဖို့ ဖြစ်ပါတယ်။
သို့အတွက်ကြောင့် တရားဟောသည့်အခါ တရားနာပရိသတ်များ ရာဂစသည် နည်းသွား ကင်းစင်သွားဖို့ကိုသာ
အလေးပေး အထူးဂရုပြု သင့်ပါသည်၊ တဏှာရာဂ ဒေါသ မာန်မာနများ တိုးပွားမှုကို ဖြစ်စေသော အနေ အထားကို တတ်နိုင်သမျှ ရှောင်ရှားသင့်သည်သာ ဖြစ်ပါတယ်၊ မှန်ပါသည် ဓမ္မဆိုတာ မကောင်းသော အနေ အထားများ အားနည်းသွားအောင် နည်းပေးလမ်းပြပေးသော သဘာဝ တရားသဘောများ ဖြစ်ပါတယ်။
ယခုအခါ အချို့သော အဓမ္မဝါဒီ ဓမ္မကထိက ရဟန်းဆိုးများကြောင့် မြတ်ဘုရားတရားတော်များ ဆေးအာနိသင် ပြယ်သယောင် ဖြစ်နေသည်ကို တွေ့နေရပါသည်။
၂။ နာကြားမှတ်သားသူများ ဘက်ကလည်း အားလုံးက အဆိုးဘက်ကသာ အသိများကြတဲ့ အဇာတသတ် မင်းကြီးရဲ့ ကောင်းသော ထုံးကို နှလုံးမူသင့်ပါတယ်။
ပထမသင်္ဂါယနာတင် ဒါယကာ အဇာတသတ်မင်းကြီးဟာ တန်ဆောင်မုန်းလပြည့်ညမှာ လပြည့်ညကို အမွှန်း တင် ပြောဆိုရင်း တရားဟောပြနိုင်တဲ့ သမဏ ဗြာဟ္မဏအမည်ခံသူတွေဆီကို သွားရောက်တရားနာဖို့ အကြံဖြစ်ခဲ့ပါတယ်။
ကြည်နူးစရာတွေ ပြောရင်း အကြံဖြစ်ပုံလေးကတော့ သူရော ကိုယ်ပါ အတုယူလိုက်နာသင့်ပါတယ်-
`သြော် ဒီ တန်ဆောင်မုန်းလပြည့်နေ့ ညဟာကွယ်
ပျော်ရွှင်ကြည်နူးဖွယ် ကောင်းပါဘိ၊ စိတ်ချမ်းသာဖွယ် ကောင်းပါဘိ၊ မှတ်သားထားဖွယ် ကောင်းပါဘိ၊
အင်း ဒီနေ့လိုညမျိုးမှာ ဘယ် သမဏ ဗြာဟ္မဏတွေဆီ ချဉ်းကပ်တရားနာယူရရင် ငါ့ရဲ့ ပူဆွေးလောင်ကျွမ်းနေတဲ့
စိတ်တွေ ကြည်လင်အေးချမ်းမှု ရရှိနိုင်မလဲ` လို့ အကြံဖြစ်ခဲ့ပါတယ်။
အဲဒီလိုအကြံဖြစ်ပြီး အမတ်တွေ ပြောပြတဲ့ မိစ ္ဆာဒိဋ္ဌိဆရာကြီးတွေ ဆီကို သွားရောက်တရားနာခဲ့ပေမယ့် သူ လိုချင်တဲ့ စိတ်ချမ်းသာမှုကို မရခဲ့ပါဘူး၊ နောက်ဆုံး သမားတော် ဇီဝက ပြောပြလို့ မြတ်စွာဘုရားရှင်ထံ ရောက်ပြီး တရားနာလိုက်တဲ့အခါမှာ သူ့ရဲ စိတ်တွေ ပူဆွေးမှုများကင်းပြီး အေးချမ်းမှုကို ရရှိခဲ့ပါတယ်။
ကဲ အဲဒီတော့ ကိုယ်ရော သူရော တရားနာတော့မယ်ဆိုရင် ကိုယ်ရဲ့ ပူလောင်နေတဲ့ စိတ်အတွက် သောက စသည် ကင်းဝေးပြီး အေးချမ်းမှုကို တကယ် ပေးနိုင်တဲ့ တရားဟော ဓမ္မကထိကထံ ချဉ်းကပ်မိဖို့ အလွန်တရာမှပဲ အရေးကြီးလှပါတယ်။ မဟုတ်ရင်တော့ ရှိတဲ့ ဝေဒနာ ပိုတိုးလာစရာသာ ရှိပါတော့တယ်။
ပြီးတော့လည်း စာရေးသူတို့နိုင်ငံမှာ တရားရေအေး အမြိုက်ဆေးတွေ အဆက်မပြတ် တိုက်ကျွေးနေသံတွေ ကြေငြာ ဆိုင်းဘုတ်တွေ ကို နေရာတိုင်းမှာ တွေ့မြင်နေရပါတယ်၊ သို့သော်လည်း ကြားသိနေရတာက နေရာတိုင်းမှာ ဘုရားခိုးမှု ဘုရားဌာပနာတိုက်ဖောက်ထွင်းမှု အလှူခံပုံးဖောက်မှု လိမ်ညာအလှူခံမှုတွေ ဖြစ်နေ သည် စသဖြင့် အမနာပ မကြားဝံ့ မမြင်သာသည့် သတင်းစကားများကို ကြားသိနေရသဖြင့် စာရေးသူ စဉ်းစားမိပါသည်။
အဲဒါကတော့ အခြားမဟုတ်-
---သြော် သူတို့တွေ တရားသံတွေ ကြားရဖန်များလို့ ဆေးများ ယဉ်ပြီး ဆေးယဉ်သူများ ဖြစ်သွား လေရော့လား-
နောက်ပြီး ဒါတွေ ငါ ကြားဖူးသားတွေပါ၊ ဘာမှ မထူးပါဘူးကွာ-လို့များ သူတို့ အထင် ရောက်နေရော့သလား၊ ဟိုက် ဆေးယဉ်သွားပြီ ဆေးမတိုးတော့ဘူးဆိုရင် သွားပြီ ဒုက္ခပါပဲ၊
အားလုံးလဲ သိမှာပါ ဆေးမတိုးတော့ဘူးဆိုရင် သွားပြီ သေပြီ အခြေအနေမကောင်းဖို့ရာ ရာခိုင်နှုန်းများ နေပြီလေ...။
နောက်ပြီး စာရေးသူ ရင်ထဲမှာ ဆန္ဒတစ်ခု ဖြစ်နေပါတယ်၊ ဆုလည်း တောင်းနေမိပါတယ်-
-တရားဟော ဆရာတော် ဓမ္မကထိကမြတ်များဟောကြားသည့် တရားစစ် တရားမှန်များလည်း အာနိသင်ထက် သော တရားဆေးစွမ်းကောင်းများသာ ထာဝရ ဖြစ်ကြပါစေ...
-သူတို့လေးတွေလည်း တရားသံတွေ ကြားရဖန်များလို့ ဆေးယဉ်သူများ ဆေးမတိုးသူများ လုံးဝ လုံးဝ မဖြစ်ကြ ပါစေ...
-တရားသံတွေ ကြားရဖန်များလို့ တရားရေအေး အမြိုက်ဆေးကြောင့် ယဉ်ကျေးလိမ္မာသူများဆိုတဲ့ ဆေးယဉ်သူ များသာ ဖြစ်ကြပါစေ...လို့။ ။ ။
မိတ်ဆွေအားလုံးကို ကျေးဇူးတင်ပါတယ်။
